1
Ale, joli kolonb, mesaje Bondye,
Ale, voye mesaj la nan zòrèy tout moun
Ale, nan Sinayi yo
Ak nan Bann-de-Gaza;
Ale bò kote Jwif yo avèk Arab yo,
Di yo li lè pou yo sispann trennen
Nan yon lavi kot chen ap manje chen
Li lè pou yo siyen yon trete de pè
Paske jistis Bondye a pa lwen poul vini.
Refren
Ale di yo sa, se Granmèt la ki voyew
Ale di yo sa,
Avni an kapab apokaliptik
2
Ale, jis anwo tèt tribin Nasyonzini,
Ale, voye mesaj la bay lemonn antye
Ale, pwofite pale ak gwo pisans yo.
Ale, di yo pou yo sispann fabrike zam;
Nan tyèmonn nan gen moun ki nan grangou
Gen timoun kap grandi nan malsite
Ki pa menm gen anyen pou yo manje;
Di yo kilè dyalòg Nò-Sid la va serye.
3
Ale, nan tout azil, nan tout Sanatoryòm
Ale, kote lavi a pa sanble ak lavi lòm;
Ale, kotek gen inosan k anprizone
Ale, di yo pran kouraj pèn yo pral fini
Ale pale ak tout botpipòl yo;
Tout moun yo frape poutèt ide yo
Di yo ya gen chans rewè peyi yo,
Paske jistis Bondye a pa lwen poul vini.
4
Ale bò kote wa ak moun ki gen pouvwa,
Ale bò moun ki renmen wè espektak san.
Ale di yo mouton Bondye a an kolè
Ale di yo jou sa a ki bò yo pral kache?
Ale mache nan tout gran tribinal,
Kote jistis ap vann lajan kontan;
Di jij sa yo se pou yo repanti,
Paske jistis Bondye a pa lwen poul vini.
5
Ale nan O.M.S. avèk nan F.A.O.
Ale di yo tyèmonn an konvalesans.
Ale kote lakwawouj entènasyonal;
Ale di yo men lavni monn nan an danje
Ale pale ak peyi OPEP yo
Ki ap monte pri petwòl la byen wo;
Di yo pou yo genyen pitye pou nou
Paske bidjè tyèmonn nan deja fin kreve.
6
Ale nan tout nayklèb avèk nan tout disko
Ale kote yap pwofite twonpe jèn yo,
Ale pwofite pale ak gwo mesye yo
Ale di yo genyen pitye pou jenès la.
Ale mache nan tout gran bòdèl
Kote yap eksplwate kò medam yo,
Di yo pa kontinye peche ankò,
Paske jistis Bondye a pa lwen poul vini.
7
Ale nan tout vale, nan tout mòn,
Nan tout plenn;
Ale konsole sila yo ki aflije
Ale kote pitit Bondye ap mouri grangou
Ale di yo pran kouraj yo va rasazye
Ale pale ak tout peyizan yo
Ki pa gen yon ti kal tè pou yo travay
Di yo annatandan ya pran kouraj
Paske jistis Bondye a pa lwen poul vini.
